Aniztasunerako leihoa: Iturramako ikasleek Kattalingune bisitatu dute - Iturrama BHI - Ikasnova

Martxoaren 25ean, asteartean, Iruñeko Iturrama institutuko DBHko 4. mailako ikasleek irteera bat egin zuten Kattalinguneko egoitza ezagutzeko, LGTBIQ+ pertsonei arreta integrala ematen espezializatutako Nafarroako Gobernuaren zerbitzu publikoa da Kattalingune. Bisita Aniztasun Hilabetea hezkuntza-proiektuaren barruan kokatu du instutuak eta oso pozik daude lortutako emaitza eta feedback-arekin ikastetxearen ekimena delako, ikasgeletan sexu-, genero- eta familia-aniztasuna lantzearena.

Hitzaldian, ikasleek funtsezko gaiei buruzko informazioa jaso zuten, hala nola genero-identitateari, sexu-orientazioari eta genero-adierazpenari buruzkoa. Ordubete baino gehiagoan, funtsezko kontzeptuak landu ziren ikuspegi didaktiko eta parte-hartzailearekin. Une azpimarragarrienetako bat talde-jarduera izan zen. Bertan, ikasleek, talde txikitan banatuta, gogoeta egin behar zuten eta egungo gizarte-testuinguruan arauz kanpoko errealitateak bizitzearekin lotutako galderei erantzun behar zieten.

Bertaratutakoen arabera, ikasleek eta irakasleek positiboki baloratu zuten esperientzia. Tentsio edo deserosotasun uneren bat izan arren — ideia errotuei aurre egiteko prozesuaren isla —, jarduerak ez zuen gorabeherarik izan, eta taldearen interes orokorra piztu zuen.

Kattalinguneko lan-taldeak hausnarketarako espazio seguru eta abegikor bat sortzea lortu zuen, non gazteek aniztasunari buruzko ikuspegia zabaldu, estereotipoak zalantzan jarri eta norberarenak ez diren bizipenetara hurbildu ahal izan zuten. Irakasle laguntzaileetako baten hitzetan, "horrelako ekimenak funtsezkoak dira inklusioarekin eta errespetuarekin konprometitutako hezkuntzarako".

Horrelako jarduerekin, Iturrama institutuak ezagutza akademikoetan ez ezik, enpatia, berdintasuna eta bizikidetza ere sustatzen dituen hezkuntzaren aldeko apustua egiten jarraitzen du.

Testua: Hodei Hernandez, Saioa Irazoki, Beñat Izko eta Iñaki Landa